Феодосий Васильевич Уляшев

1905–?

Уроженец с. Вольдино. На Великую Отечественную войну призван в октябре 1942 г., рядовой. Демобилизован в августе 1945 г.

«Книга памяти Республики Коми», том 6, стр. 823

Пулемётсянь лыйлiс поп

  Феодосий Васильевич Уляшев чужис 1905-öд воын. Велöдчис Вöльдiнса начальнöй школаын сöмын 3 во. Войнаöдз уджалiс вöрпунктъясын да «Вöр фронт» колхозын.

 Фронт вылö нуисны 1941-öд вося июль 17-öд лунö.

 Ветеран казьтывлö:

  – Вöльдiнсянь Кулöмдiнöдз колльöдiсны вöлöн. Сэсянь Котласöдз кывтiм пароходöн, водзӧ  Вӧлӧгдаöдз поездöн. Вӧлӧгдаын миянлы сетiсны автомат, гранатаяс, обмундирование. Ыстiсны Эстонияö. Вöлiм 20 морт. Сэтчö жö фашистъяслöн воöма 60 морта карательнöй отряд, кодi быд ногыс смекайтчисны крестьяна вылын, торъя нин нывбабаяс вылын. Миян могöн вöлi вöтлыны сэтысь немечьясöс. Дзик пыр пырны сиктас эг вермöй: миянöс лыйлiс пулемётысь кöлöкöльня вывсянь поп. Комбат тшöктiс кытшавны вичкосö, но немечьяс удитöмаöсь нин мунны. Танi ме ранитчи, ты пыр пуляыс мунöма. Колисны Ленинградö. Танi сэсся Ленинград дорас вöчалiм аэродромъяс вылын укрытиеяс. Новая деревня, Колпино, сэсся Колпиносянь Ленинградöдз 30 км вайисны подöн: висьми да веськалi госпитальö.

 Апрель 9-öд лунö петкöдicны машинаясöн Ладога ты йи вывтi Тихвинö. Сэсянь Вöлöгда пыр Казахстанса Акмолинск карса госпитальö, а карса военкомат тшöктöм серти – гортö.

 1942-öд вося июль медводдза лунö сетiсны 2-ӧд группаа инвалидность. Гортын олi 4 тöлысь, и Сталинскöй указ серти бöр босьтiсны фронт вылö. Веськалi Ленинград обласьтö жö дорожнöй батальонö. Вöчим туй Лодейное поле – Свирь ю костöд. Дасьтісны зырны финнъясöс. Тайö Мурманск – Норвегия – Польша – Венгрия – Австрия – Чехословакия. Позьö шуны, став Европасö кытшовтiм. Война помасис Прагаын. Гортö вои 1945 вося августын.

 Артмö, мый Феодосий Васильевич воюйтiс 1941 вося октябрсянь 1945-öд вося июнь 23-öд лунöдз. 159-öд дорожно-строительнöй батальонса юкӧнын 34-ӧд запаснöй стрелкӧвöй полкын вӧлі 1942-öд вося октябрсянь 1942 вося декабрöдз, и бара воддзаинас.

 Эм «За победу над Германией в Великой Отечественной войне 1941–1945 гг.» да юбилейнöй медальяс.

                  Ю.П. Сергатова

Материал предоставлен Вольдинской библиотекой